DIY: lag ein polstra/ stoppa sengegavl

Eg har lenge hatt lyst på ein deilig, eksklusiv, tjukk sengegavl og snekra difor saman denne:

Polstra DIY sengegavl med "nagleknappar"

Eg mangla ein knapp (knappana vart bestilt før skissa, whops). Sambo hadde heldigvis ein "Moods of Norway-knapp" på lur :)

Utstyrsliste 

• kryssfinner/ sponplate (eg kjøpte kryssfinner, 9mm tjukk hos Bygger`n  for dei kunne kappe til rett str. :))
• plankar (hvis ein vil ha bein på gavlen)
• drill
• stikksag (ikkje naudsynt)
• stiftemaskin
• skruar
• spraylim (kjøpt hos Biltema)
• skumgummi (eg brukte ein dobbel overmadrass, ca.10 cm., ellers har dei rimelege skumgummimadrasser hos Jysk)
• vatt (hobbyforretning)
• stoff (berekn ekstra stoff for å få festa det på baksida, eg hadde 30 cm å "gå på". Kjøpte stoffet på salg her: Stoff og Stil ) 
• knappar (med ein "halvsirkel" på baksida, til tråden. Eg brukte desse, som ser ut som naglar: Totallybuttons)
• lang nål (minst 15 cm)
• ekstra sterk tråd (knappetråd)

Framgangsmåte 

Skisse til sengegavlen

1. Skisser

Eg byrja med nokre skisser for å finne passelig høgde på gavlen, antall knappar og avstand mellom knappane. Ruteark med 0,5 mm ruter tilsvarara 5 cm. "in real life".                     

2. Mål opp og merk plata

Slik vart det enkelt å måle opp og merke av tilsvarande punkt på baksida av kryssfinnerplata, og bore hol stort nok til å tre nåla gjennom.

3. Rund av hjørna

For å få avrunda hjørne la eg ein tallerken på dei to øverste hjørna på plata, merka med blyant og kappa med stikksag. Smak og behag om ein går for runde eller firkanta hjørne, vatten vil uansett runde dei av noko :)

4.  Lim

Lim fast skumgummien på plata med spraylimen (skumgummien skal vere like stor som plata). Lurt å gjere utandørs. Eg skar til skumgummien "sånn ca." til plata før eg festa den, og tok finpussen etterpå med saks. Dersom skumgummien vert "hakkete" i kantane, dekkje vatten dette.

5. Merk og skjer hol

Merk av knappeplasseringa på skumgummien (tilsvarende som merkinga bak plata). For at polstringa skal verte djup, må ein skjere hol i skumgummien og inn til plata så knappane kjem djupt nok utan å trykke saman skumgummien mellom knappane. Eg skar hol på ca. 2x2 cm (litt større enn knappane) og brukte tapetkniv. Igjen, det gjer ikkje noko det vert hakkete for vatten dekkjer dette.                                                                                                                                                                                                                                   

Knapp nr.1 på plass, festa med skrue på baksida

6. Vatt

Legg på vatten og fest den på baksida av plata med stifter.

7. Fest knappane

Så den mest tidkrevjande delen, å "forme" stoffet og feste alle knappane! 

Det er lurt å ha 10-20 cm ekstra stoff rundt alle kantane for å feste stoffet, og fordi polstringa også "stel" litt stoff.

Fordel stoffet jevnt på gavlen (eg hadde gavlen ståande i eit hjørne, inntill veggen). 
Tre nåla med firebobbel tråd og stikk nåla inn i eit av hola i midten oppe på gavlen, frå baksida. Det er lett å kjenne når ein treff (nåla skal gjennom holet i skumgummien). Stikk nåla inn, vannrett. Pass på at det heng igjen ein trådbit på baksida, og drag tråden utav nålauget på framsida.

Ta ein skrue eller ein spikar og del den firedoble tråden i to (på baksida), og smett skruen i mellom tråden og plata. Stram tråden på framsida og skruen skal hengje av seg sjølv.

Så tredde eg den delte tråden gjennom knappeåpningen, eine enden fra venstre og andre enden fra høgre (viktig for at knyttinga skal fungere). Stram trådane til knappen ligg inntill stoffet. Fortsett å hald trådendane stramme medan du presser knappen heilt inn til plata. Her er det veldig kjekt å ha ein medhjelpar! Ein som held trådane, og ein som pressar knappen inn. Eg utvikla etterkvart ein akrobatisk "sjimpanseteknikk" på dette, pressa knappen inn med foten medan eg stramma og knytte :)..  

Gulltraktor :D         Diamantpolstring     "Nagleknapp"

Knut ein vanleg knute (slik ein lagar før sløyfa når ein knytter sko) og stram til det "smell" og knuten forsvinn bak knappen. Gjenta to-tre gongar, og knappen sit fast. Hald fram med å trykkje inn knappen til du har laga minst to knutar. Vips, fyrste knapp på plass! Berre 46 igjen :O (Det er sjølvsagt valgfritt kor mange knappar ein vil ha :)).

Fortsett med knappane i midten jobb deg utover. Stoffet bør ikkje festast alt for stramt, då kan det verte vanskeleg å forme "rynkene". Leik med stoffet etterkvart som knappane vert festa, det er rimeleg enkelt å forme til eit diamantmønster :). 

Det er lurt å la foldane gå "nedover" slik at dei ikkje samlar støv. Eg "prøvestakk" tuppen av nåla gjennom stoffet og undersøkte om plasseringa passa i forhold til dei andre knappane, før eg trakk nåla heilt igjennom. Eitt par gongar vart plasseringa så feil at eg måtte kappe tråden og byrje på ny.
Denne videoen viser korleis ein lagar diamantmønsteret:

                                                                                  

Gavlfot med "vattdott", vakkert! 

8. Fest stoffet

Fest stoffet på baksida med stifter. Lag foldar det det passar og stramm opp stoffet. Eg lage dei rett ut frå knappane mot kanten. Eg festa stoffet ekstra stramt i foldane, slik at profilen på gavlen vart "klumpete".

9. Bein

Det er mogleg å feste gavlen i veggen, men eg valge å lage bein for å sleppe å lage hol i veggen. Eg skrudde fast stoffkledde plankar i ynskja høgde, etter å ha runda av hjørna øverst. Gavlen sluttar nokre få cm. nedanfor madrassa, slik at senga står heilt inntill veggen (med kun beina imellom madrassen og veggen). Eg festa beina så langt inne på plate at dei ikkje viser når ein ser gavlen i front. I tillegg festa eg ei fjøl øverst på gavlen slik at det ikkje vart eit "hol" her.

10. "Vattdottar"

Til slutt stifta eg på nokre "dottar"med vatt for å beskytte veggen mot merke. Voilà!

"Livet er en gåte, og løsningen står på baksiden." Storm P. Ein filosofisk gavl ;)

Her henta eg maange gode råd: DIY Tufted headboard 

Gavlen i sitt rette element: 

DIY polstra sengegavl

I tillegg har eg nok stoff til eitt nytt, matchande kappelaken:D ..Snille svigermor har lova å sy. Bilder kjem seinare!
Meir inspirasjon: Dagbladet- lag din egen sengegavl

Er det nokon som har andre idèar til sengegavl?